peshmerge Dشۆڕە سوارێکم بێ حەسانەوە
پێشەنگێکم بێ کشانەوە
رێبوارێکم بێ گه ڕانەوە
من بیناییم
تارمایی شەوەزەنگی بێ ئە ستێرە دە ڕەوێنمەوە
ڕێگای تاریک وتاریخ دە گە شێنمەوە
من وزه م
هەنگاویی ئەڤینداری سه ربەستی وڵاتەکەم بە گووڕ و پتەوتر دەکەم
من جریکەم
حەماسەخووڵقێنی بێ پسانەوەی هاواری گەلێکی مافخوراوم
من سارۆم
پێشەنگی کاڕروانێکی نە حەساوەی بە رێوەم
من پێشمەرگەم
ڕۆڵەو پەروەردەی نیشتمانێکی داگیرکراویی چوار قاش بووی بەشخوراوم
من لوتکەی هەڵوێستم
من ئاگریم ،
قەدیلم کێلەشینم
شاەهۆ و داڵاهۆم
ئاڕباباو گیارەنگم
تەرەغەم
بێستوونم، سه رشاخانی نەغەدەم
هەڵگوردو نەکەرۆزم ، باواجیم
هەیبەت سووڵتانی بەهەیبەتم
لە جێگای خۆم قورسو وقایم ، گوورج وگۆڵ لە مەتەریزی شەرەفدام
پەناگاو قەرارگای لێقەڵماوانم
من باوەڕم ، قەڵای لە گیران نەهاتووم
من دارو درەختم ،
چەترم، کەپرم
سێبەردەکەم بۆ حەسانەوەی ماندوو نەناسانی دوورە رێی
نە ڕەشە بادە توانێ ڕامچڵەکێنێ نە تۆفانیش له ریشەم دەربێنێ ونە ئاگریش بمسووتێنێ
من ریشەم لەناو دڵ و دەروونی دلێ نەتەوەدا کووتاوە.
من ئەمانەتدارم
هەڵگری رازو ره مزی نەدرکاویی شۆڕە سوارانی بێ ناونیشان و هەڵۆ بەرزەفڕکانی لووتکە چڕو هەڵەمووتەکانی کوردستان و سەرربازانی بێ ناونیشانی نیشتمانم.
ئامانج و رێگاورێبازی جەنگاوەرانی بێ ناوو نازی خۆرەتاو بەلامەوە ئەمانەتە.
من ماسیم
ناو بەحری هەراویی خەڵکانێکی چەوساوەدا دەژیم، دەریام لە پشتە و باران دەمژێنێ.
بێشکەم ئەشکەوتە
سروشت دایکمە
لەسەرسینگی خۆی دەمخەوێنێ
کانیاوەکان گۆی مەمکیان دەخەنە ناودەمم.
من گڕکانم
بڵێسەی بەتین وگەرمم کۆشکی زۆردار دەسووتێنێ
من قانعم
بە به شی خۆم رازیم کە چی ڵێمیان زەوت کردووە.
من هەڵۆم
بەهێزوچنگ بەگڕم ، جێگاوپێگەی به رزم بۆ فڕین دەوێ.
من چاوم
ئاسۆی روون دەبینم و موژدەی سەربەستی بۆگەلم پێیە
من پێنووسم
تابڵۆی داستانی سنوورێکی سوورو سۆڕشێکی خوێناویی ونیشتمانێکی پڕلە خۆین وئاگر بە خەتی زێڕین دەکێشمەوە.
من مێژووم
بیرەوەری ئازایەتی وخۆڕاگری ومەردایەتی پێشمەرگە بۆ نەوەکانی داهاتوودەگێڕمەوە.
من پێناسەم
شوناسی نەتەوەیەک دەناسێنم
من هەورم ، بەورم ، تەورم
بارانی رەحمەت دەبارێنم
دێویی نەزۆک دەتارێنم
ریشەی زۆردار دەبڕمەوە
گووڵی سه ربەستی ئەڕوێنمەوە
داری ئازادی ئەچێنمەوە
من پێشمه رگەم
کوت وزنجیرنامترسێنێ
دەربەده ری نامڕەنجێنێ
گوولڵە وئیعدام نامبەزێنێ
سەرماوسەهۆڵ نام لەرزێنێ
گەردەلوولیش ناملەرزێنێ
من پێشمەرگەم ڕۆڵەی 26ی سەرماوەزم
چاونەترس وترس بەزێن
من راسانەوەم
مەرگ لێم دەترسێ
ترس لێم ڕادەکا
هەڕەس بە زۆری زۆرداردێنم
تاکوو بە ئامانجی گەل نەگەم
واز ناهێنم
واز ناهێنم
واز ناهێنم
سە لاح سە مە دی