logo se rekxrawپێشمەرگە، هێمای بەرخۆدانی نیشتمانێک

پیرۆز بێت ڕۆژی ئەو كەسانەی كە بە ئازایەتی و جوامێریی خۆیان، پەیامی ڕەوایی دۆزی نەتەوەكەیان لە جیهاندا بڵاو كردەوە. 


پێشمەرگە، بەری داری ڕەنج و حەماسەی مێژووی نەتەوەیەكی ئازایخواز بۆ خۆڕاگری و مانەوەیە
كە جیهان ئەمڕۆ وەكوو پێناسەی بەرزیی ڕەوشت و سیمبۆلی پاراستنی كەرامەتی مرۆڤ شانازی بە بوونی دەكات.

لەو كاتەوە كە نەتەوەی ستەملێكراوی كورد لەگەڵ وشەی ڕاچەنین و بەرەنگاری ئاشنا بوو و هەستی بە پێویستیی فاكتەرێك بۆ گۆڕینی هاوكێشەی ژێردەستەیی و چەوسانەوە لە ناوچەكەدا كرد، پێشمەرگە بە هەیبەتێكی چیاییەوە ئاڵای خەباتێكی بێ پسانەوەی بەرز كردەوە و مرۆڤی كوردی لەوە دڵنیا كردەوە كە ئەگەر پشت بە خۆی و ئیرادە و تواناكانی خۆی ببەستێت، هێز نیە بتوانێ هەرەس بە باوەڕ و ئیرادەی بەرخۆدانی بهێنێت و تەنیا یەكخستن و ڕێكخستنی پێشمەرگانەیە كە دەتوانێ كورد لە دۆخی تەریككەوتوویی و لە سەر لێواری تێداچوونی یەكجاری ڕزگار بكات.

هەروەك دەزانین، لە سەرەتای هاتنەئارای فۆرمی نوێی دەسەڵاتداری و "دەوڵەت ـ نەتەوە" لە ڕۆژهەڵاتی ناوەڕاستدا، داگیركەرانی كوردستان و دوژمنانی ماف و ئازادیی نەتەوە بندەستەكان توانیان هێندێك لە گەلانی ژێردەستیان تاڕادەیەك بتوێننەوە و تامەزرۆیی و حەزی ڕزگاریی نەتەوەییان تێدا بكوژن، بە جۆرێك كە ئەو گەلانە ئێستاشی لەگەڵ بێت نەیانتوانیوە هێز و وزەی خۆیان بۆ خەباتێكی ڕزگاریخوازانە وەسەریەك بخەن و ببنە خاوەنی نەزم و ڕێكخستنێكی شیاو بۆ ڕزگاربوون لە دۆخی ژێردەستەیی.
بەڵام گەلی كورد سەرەڕای هەموو زەبروزەنگ و قەڵاچۆكردنەكان، توانیی وەكوو هێزێكی پێشڕەو بمێنێتەوە و ببێتە هۆكارێك بۆ ئەوەی كە دیكتاتۆری و سەرەڕۆیی و داگیركاری هەرگیز دۆخی سەقامگیری و دڵنیابوون لە مانەوە بەخۆیەوە نەبینێت.
جیاوازیی دۆخی كورد لەگەڵ نەتەوە بندەستەكانی دیكە لەوەدا بوو كە بزووتنەوەی كورد بە دەستپێكردن و پێداگری لە سەر خەباتی پێشمەرگانە و پەرەپێدانی فەرهەنگ و ورەی پێشمەرگە وەكوو بەشێك لە فەرهەنگی سیاسیی كۆمەڵگای كوردی لە هەموو بوارەكان و لە نێو هەموو چین و توێژەكاندا توانیی باڵانسی نادادپەروەرانەی هێز تێك بدات و تای تەرازووی سیاسەتی ناوچەیی بە لای خۆیدا بشكێنێتەوە.

پێشمەرگە یادگاری بەنرخی كۆمارە هەمیشە زیندووەكەی كورد، ئەو فاكتەرە یەكلاكەرەوەیە بوو كە داگیركەران و ناحەزانی كوردی هەر زوو تێگەیاند كە ئیدی توانەوەی كورد مەحاڵە و بۆ تێكشكاندنی شۆڕشەكانی كورد دەبێ هاوپەیمانیی ئیستراتژیك لە نێوانیاندا پێك بهێنن، بەڵام ئەو هاوپەیمانێتییە نگریسەش فریایان نەكەوت و ئەمڕۆ زیاتر لە هەر سەردەمێكی دیكە بۆ هەمووان ئاشكرا بووە كە سەەردەمی سڕینەوەی كورد و حاشاكردن لە هێزی پێشمەرگە لە هاوكێشە سیاسییەكانی ناوچە و جیهان كۆتایی پێ‌هاتووە و ئەوە پێشمەرگەی كوردە كە وەكوو یەكێك لە سەرەكیترین ئەكتەرەكانی كایەی سیاسی بۆ دانانی بەردی بناغەی نەزمی نوێی جیهانی لە ڕۆژهەڵاتی ناوەڕاستدا ڕۆڵ دەگێڕێت و نەك هەر بە نوێنەرایەتیی جیهان بەرەنگاری دێوەزمەی تیرۆر و كۆنەپەرەستی و هۆڤانیەت بۆتەوە، بەڵكوو پارێزگاری لە شارستانیەتی مرۆڤ دەكا و بۆ خۆی وەكوو بەشێك لە شوناسی نەتەوەیی كورد، لە گۆڕەپانی ململانێ سەختەكانی ناوچە و جیهاندا ئاڵای دیاریكردنی چارەنووسی گەلەكەی بە سەربەرزی و لێوەشاوەییەوە ڕادەشەكێنێت.

12391994 1111135778898224 4576880574858265957 n

ئێمە یەكیەتییەكانی ژنان، لاوان و خوێندكارانی دێموكراتی كوردستانی ئێران وێڕای نوێكردنەوەی پەیمانی وەفاداری لەگەڵ شەهیدانی پێشمەرگە و ڕێزدانان بۆ خەبات و گیانبازیی پێشمەرگە قارەمانەكانی كوردستان، وەك هەمیشە خۆمان بە بەشێك لە هێزی بەرگریی ڕەوا و دێموكراتیكی نەتەوەكەمان لە پێناوی دێموكراسی و مافی دیاریكردنی چارەنووسی نەتەوەكەماندا دەزانین و 
بە بۆنەی 26ی سەرماوەز، ڕۆژی پێشمەرگەی كوردستانەوە دەستی هەموو خەباتكارێكی ڕێگای ڕزگاری و یەكگرتوویی نەتەوەكەمان بە گەرمی دەگوشین و سڵاو و پێرۆزبایی خۆمان ئاراستەی هەموو پێشمەرگە گیان لە سەر دەستەكانی كوردستان دەكەین.

سەركەوتوو بێت خەبات بۆ ڕزگاریی نەتەوایەتی
پێرۆز بێت 26ی سەرماوەز، ڕۆژی پێشمەرگەی كوردستان

یەکیەتییەکانی لاوان، ژنان و خوێندكارانی دێموكراتی كوردستانی ئێران
٢٦ی سەرماوەزی ٢٧١٥ی کوردی