lawan 94 8i march     8ی مارس هێمای خەبات و تێکۆشانی مرۆڤەکان بۆ رزگار کردنی نیوەی کۆمەڵگا لە دەستی کۆنەپەرەستی و زوڵم‌و‌زۆری پیاو‌سالاری لە هەموو ژنانی ئازا و پیاوانی رزگاریخواز، پیرۆز بێت.

 

ڕۆژی هه‌شتی مارس له‌ مێژووی ژیانی ژنانی کۆمه‌ڵگای نێونه‌ته‌وه‌یی‌دا بایه‌خێکی تایبه‌ت به‌ خۆی هه‌یه‌ و له‌ به‌ره‌وپێش بردن و گه‌شه‌سه‌ندنی خه‌باتی ژنان بۆ وه‌ده‌ستهێنانی، کاریگه‌رێکی قوڵ و بنه‌ڕه‌تی هه‌یه‌. دیاری کردنی ئه‌و ڕۆژه‌ وه‌ک ڕۆژی جیهانی ژنان به‌رهه‌می خه‌بات و تێکۆشانی به‌شێکی به‌رچاو له‌ ژنانی ئازا و بوێر و خه‌باتگێر پێگه‌یشتوویه‌ که‌ له‌و ڕیگایه‌دا ڕه‌نجێکی زۆریان کێشاوه‌ و ئازارگه‌لێکی بەرچاویان بۆ به‌ده‌ستهێنانی مافه‌ره‌واكانیان بینیوه و له‌و پێناوه‌شدا گەلێک قوربانی دراوه‌‌.

 

لەم بۆنە پیرۆزەدا ئاواتەخوازین کە بە هەوڵ و کۆششی هەمەلایەنەی سەرجەم چین و توێژەکانی کۆمەلگای کوردستان و ئێران  ژیانێکی باشتر و مرۆڤانە کە شیاوی مرۆڤ بوون و مرۆڤی ژن بێت  دەستەبەر بکرێت.  

 

بە تایبەت کە لە وڵات و کۆمەڵگای ئێمەدا  و لە ژێر دەسەڵاتی رووخێنەر و سیاسەت و رێوشوێنی ناسەردەمیانەی کۆماری ئیسلامی ئێران  و لەمەش بترازێ بە هۆی داب و نەریت و روانینی دژە مرۆڤانەی بەشێک لە کۆمەلگا بۆ مرۆڤی ژن  و مافەکانی، ژنان لە ژێر گوشارو چەوسانەوەدان، هەر بەم هۆیەوشەوە بەرەورووی توندترین شێوەکانی توندوتیژی بوونەتەوە و مخابن ژن لەم دۆخ و هەلومەرجەدا بۆتە گەورەترین قوربانی.

لە حاڵەتە گشتیەکەی دا و بەو هۆکارانەی کە باس کران، نۆرم و بەهاکانی کۆمەڵگا، بنەماڵە  و تاکی ژن کراوەتە ئامانج.

لەم یادە پیرۆزەدا، وەک پرەنسیپێکی ئینسانی، ئەخلاقی و رێکخراوەیی، بەرپرسایەتی خۆمان سەبارەت بە لابردنی هەڵاواردن و چەوسانەوە  و نایەکسانی لە نێوان ژن و پیاودا دووپات دەکەینەوە و ئاواتەخوازین کە هەوڵەکانمان لە راستا و لە پیناوی گەڕانەوەی بەها  و پیرۆزیەکانی ژن بوون و دەستبەرکردنی ئازادی، یەکسانی، عەداڵەتی کۆمەڵایەتی و مافەکانی ژنان سەرکەوتوو بێت.

 

وێڕای پیرۆزبایی و بەرراگرتنی ئەم یادە، پاڵپشتیی خۆمان بۆ خەباتی رەوا و یەکسانیخوازانەی ژنانی وڵاتەکەمان دووبارە دەکەینەوەو هیوادارین کە ژنان لە ئەرکی پیرۆزی  خەبات بۆ سەرخستنی ئازادی ویەکسانی و دادپەروەری سەرکەوتوو بن.

 

یەکیەتیی لاوانی دێموکراتی کوردستانی ئێران

٧ی مارسی ٢٠١٦