nawrozi lawan 95 "بە بۆنەی هاتنەوەی جەژنی سەری ساڵی نوێ و نەورۆزی کوردەواری"

 

کوردستانیانی خۆشەویست!

لاوانی بەهەستی ڕۆژهەڵات!

ئەندامان و لایەنگرانی یەکیەتی لاوانی دێموکراتی کوردستانی ئێران!

سەرەتا بە ناوی دەستەی بەڕێوەبەری یەکیەتیی لاوانی دێموکراتی کوردستانی ئێرانەوە گەرمترین و بۆن‌خۆشترین پیرۆزباییتان بە بۆنەی سەر لە نوێ هاتنەوەی نەورۆزی کوردەواری، نەورۆزی سەرهەڵدانەوە و پشکووتن، نەورۆزی هێمای هەرمان و هۆمێد پێشکەش دەکەین و ئاواتەخوازین کە هەر وەک لە مێژووی کۆنی گەلی کورددا پشت بە پشت هاتووە، سەرلەنوێ هاتنەوەی ئەم جەژنە نەتەوەییە، ببێتە جەژنی سەر لە نوێ خۆسازدان و ئەستاندنەوەی ئازادی لە سەرانسەری کوردستان، ببێتە هەوێنی سەرلەنوێ ژیانەوەی بزووتنەوەی ڕزگاریخوازی گەلەکەمان و نوێ‌کردنەوەی پەیمانی وەفاداری و یەکریزی نێوان لاوانی بە‌هەست و شۆڕشگێری نەتەوە بەش‌خوراوەکەمان لە کوردستانی ڕۆژهەڵات.

 

ئازێزان!

لێرەدا پێویستە هەموومان ئەو ڕاستییە بزانین کە وەدیهاتنی ئاوات و ئامانجەکانمان و چارەسەری پرسەکانی ئێمە چ وەکوو توێژی لاو و چ وەکوو نەتەوەی کورد لە هەرچوار بەشەکەی کوردستان بە گشتی و بەتایبەتی لە کوردستانی ڕۆژهەڵات، دەبێ لەسەر ئەساسی یەکریزی و یەکگرتوویی و متمانە بەخۆبوون و پشت ئەستووربوون بە گەلەکەمان پێناسە و تەعریف بکرێتەوە، چوونکە مێژووی نەتەوەکەمان سەلماندوویەتی کە دواڕۆژی چاولەدەستی، دەست بەتاڵییە.

بۆیە با هەموومان دەست لە ناو دەستی یەک و ڕوو لە گەلەکەمان هاوار بکەین، بێجگە لە ژیانەوە و سەرهەڵدانەوەی سرووشت، نەورۆز بۆ ئێمە هەڵگری پەیامی بەرەنگاربوونەوەی زۆرداری و ستەمی نەتەوایەتی و چینایەتییە لە ئێران و کوردستانی ڕۆژهەڵات، و تا بەدەستهێنانی یەکجاری مافە سیاسی و یاساییەکانی خۆمان، هەر بەردەوام لە تێکۆشان دەبین و کۆڵ نادەین.

 

بە هیوای وەدیهاتنی هیوا و ئاواتەکانی گەلەکەمان و بەتایبەت توێژی لاو لە کوردستانی ڕۆژهەڵات

جارێکی دیکە نەورۆزی کوردەواری لە هەمووتان پیرۆز بێ

بە هیوای ساڵێکی خۆش و پڕ دەسکەوت بۆ هەموو لاوێک

 

یەکیەتی لاوانی دیموکراتی کوردستانی ئێران

٢٥ی رەشەممەی ٢٧١٥ی کوردی

١٥ی مارسی ٢٠١٦ی زایینی