logoi pshtiwani le kebudwend se rekxraw 95داكۆكیكارانی مافی مرۆڤ!

ئازادیخوازان!

مرۆڤدۆستان!

 

وەك ئاگادارن ماوەی 9 ساڵە موحەممەد سدیق كەبوودوەند، ڕۆڵەی بەئەمەگی نەتەوەی ستەملێكراوی كورد و خەباتگێڕی ڕاستەقینەی ڕێگای داكۆكی لە مافی مرۆڤ، لە گرتووخانەكانی ڕێژیمی مرۆڤكوژی كۆماری ئیسلامیی ئێراندا، قارەمانانە بەرەنگاری دڕندانەترین هەڵسوكەوتی سیستمێك بۆتەوە كە ستەم و هەڵاواردن و بێ مافیی مرۆڤەكانی كردۆتە بناغەی سەرەكیی دەسەڵات و ئیدئۆلۆژیی خۆی، هەر بۆیە هەوڵ و خەباتی كەبوودوەندەكان بۆ وەبیرهێنانەوەی مرۆڤبوونی مرۆڤەكان بە دەنگی "نا"یەكی ڕووخێنەر بۆ بناغە وەهمییەكانی دەسەڵاتی نگریسی خۆی لە قەڵەم دەدات و وەك نەریتی هەمیشەیی خۆی، بە زمانی سیاچاڵ و سەركوت و سرێنەوە وەڵامی دەداتەوە.

 

لە ماوەی ئەو 9 ساڵەدا بەڕێز كەبووودوەند كە ڕێكخراوی مافی مرۆڤی كوردستانی بۆ داكۆكی لە مافی پێشێلكراوی مرۆڤەكانی وڵاتەكەی دامەزراندبوو، هەر بە هۆی ئەو هەنگاوە مرۆییەی كە لە سیستمی كۆماری ئیسلامیدا بە گەورەترین تاوان دەژمێردرێ، دەستبەسەر كرا.  كەبوودوەند لەو ماوەیەدا لە نێو ئەشكەنجەگاكانی ڕێژیم تەنانەت لە سەرەتاییترینی ئەو مافانەش كە هەوڵی دەدا بۆ مرۆڤەكانی دیكە دەستەبەریان بكات، بێبەش كرا و هەر بەو هۆیەوە لە بەندیخانەدا لەگەڵ دۆخێكی نالەبار بەرەوڕوو كرا و تووشی چەندین نەخۆشی و تێكچوونی باری تەندروستی بوو.

 

دوایین ستەمێك كە لەو خەباتكارەی ڕێگای بەدیهێنانی بەختەوەریی مرۆڤ كرا، ئەوە بوو كە بە نزیكبوونەوە لە مانگەكانی كۆتایی حوكمی نادادپەروەرانەی زیندان، ڕێژیم بە داتاشینی هێندێك تۆمەتی نوێ، هەوڵی دا ماوەی بەندكرانی كەبوودوەند درێژ بكاتەوە.

لە بەرانبەر ئەو غەدرە ئاشكرایەدا بەڕێز كەبوودوەند لە ڕۆژی ١٩ی بانەمەڕەوە دەستی داوەتە مانگرتن لە خواردن و داوای هەڵوەشاندنەوەی حوكمە ناڕەوا و داسەپاوەكان لە سەر خۆی دەكات.

 

بەداخەوە تا كاتی دەرچوونی ئەم ڕاگەیەندراوە، سەرەڕای ئەوەی كە بەرپرسانی پێوەندیداری كۆماری ئیسلامی هیچ ئاوڕێكیان لە داخوازییەكانی ناوبراو نەداوەتەوە، بەردەوامبوونی مانگرتنەكە بۆتە هۆی مەترسیی زیاتر بۆ سەر تەندروستیی بەڕێز كەبوودوەند و تەنانەت بەپێی هەواڵە بڵاوكراوەكان دەوترێت گیانی لە مەترسیدایە.

 

ئێمە ڕێكخراوەكانی لاوان، ژنان و خوێندكارانی دێموكراتی كوردستانی ئێران وێڕای مەحكووم‌كردنی هەڵسوكەوتی دژە مرۆیی كۆماری ئیسلامی لەگەڵ پرسی مافی مرۆڤ و بە تایبەتی دۆسیەی "محەممەد سدیق كەبوودوەند"، دەنگی خۆمان دەخەینە پاڵ دەنگی هەموو ئەو كەس و لایەنە مرۆڤدۆستانەی كە لەو ماوەیەدا هەوڵیان داوە كۆڕ و كۆمەڵە جیهانییەكان و بیروڕای گشتیی كۆمەڵگای مرۆیی لە دۆخی قەیراناویی مافی مرۆڤ لە ئێران و كوردستانی ژێردەسەڵاتی كۆماری ئیسلامیی ئێراندا ئاگادار بكەنەوە و داوا دەكەین دەستبەجێ لە هەموو میكانیزمەكان بە مەبەستی گوشارهێنان بۆ سەر ڕێژیمی ئێران كەڵك وەربگیرێت و داوا لەو ڕێژیمە بكرێت بە زووترین كات كەبوودوەند ئازاد بكات و ڕێگا بدات تیشكی چاوەدێریی مرۆیی، سیاچاڵەكانی ئەو ڕێژیمە ڕووناك بكاتەوە كە بوونەتە ئەشكنجەگایەك بۆ ئازاردانی مرۆڤەكان و مافخوازانی ئێران و كوردستان.

 

هەروەها داوا لە خەڵكی كوردستان و ئێرانیش دەكەین بەرانبەر بە دۆسیەی كەبوودوەند كە لە ڕاستیدا دۆسیەی هەموومان و چیرۆكی بێ مافیی گەلانی ئێران لە بەرانبەر سیستمێكی داپڵۆسێنەری ئیدئۆلۆژیكدایە، بێدەنگ نەبن و بە هەر شێوەیەك كە دەتوانن، دەنگی ناڕەزایەتیی خۆیان بەرانبەر بەو ڕێژیمە ئازادیكوژە بەرز بكەنەوە و پاڵپشتیی خۆیان لە داخوازییەكانی بەڕێز كەبوودوەند دەرببڕن.

 

یەكیەتییەكانی خوێندكاران، لاوان و ژنانی دێموكراتی كوردستانی ئێران

  13ی جۆزەردانی 1395ی هەتاوی

2ی ژووئەنی 2016ی زایینی