logoi rekxrawekani lawani rojhelat

خەڵکی تێکۆشەری کوردستان

کچان و کوڕانی تێکۆشەر و ئازادیخواز

بنەماڵەی سەربەرزی گیانبەختکردووان

بە بۆنەی هاتنی نەورۆز و نوێبوونەوەی ساڵی تازەی کوردی و لە گەڵ ژیانەوەی گوڵ و گوڵزار و سەوزەڵانی و هاتنی خۆرەتاوی بەهاری گەرم و گەشترین پیرۆزبایی ئێمەتان پێشکەش، ئاواتەخوازین ساڵی نوێ ساڵی خۆشی و شادی بێ بۆ هەموو لایەک و ساڵی سەرکەوتنی بزوتنەوە رەواکەمان بێت لە پێناو گەیشتن بە ئازادی و مافە رەوا و بەرحەقەکانی.

نوێ بوونەوەی ساڵ و نەورۆزی کوردەواری بۆ ئێمە وەک گەلی کورد ئاوێنەی باڵانوێنی روحی نەتەوەییمانە، هێمای یەکریزی و پتەوی خەباتەکەمان و چڕکردنەوەی هەوڵی بەردەواممانە بۆ زاڵبوون بە سەر تەنگ و چەڵەمەکانی ژیان و خەبات لە پێناو ژیانێکی باشتر، رۆژی هەڵکردنی شنەبای ئازادیە.

نەورۆز بە دریژایی تەمەنی بزووتنەوەی کوردستان رۆڵێکی گرینگ و مێژوویی لە رووداوە هاوچەرخەکانی بزوتنەوەی کوردستان دابووە و بەردەوام وەک رەمزی یەکگرتوویی و تەبایی و پێکەوەژیان بۆ گەلی کورد لە هەموو پارچەکانی کوردستان یادی لێ کراوەتەوە و خەڵکی کوردستان هەر ساڵێ بە گەرمو گوڕییەکی زیاترەوە بەرەوپیری نەورۆز دەچن و بە کردنەوەی ئاگر و شادی و خۆشی ساڵی تازەی کوردی جەژن دەگرن.

کۆمەڵانی تێکۆشەری خەڵکی کوردستان

ئەمساڵ لە هەلومەرجێکدا بەرەوپیرۆ نەورۆز دەچێن کە بە ئاشکرا شایەدی پێشێلکاردنی مافی پێکهاتەکان لە ئێران، کوشتن و بریندارکردنی کۆڵبەران لە سنوورەکانی کوردستان و پێش گرتن بە سەرجەم چالاکییە فەرهەنگی و بۆنە نەتەوەییەکان، بێبەش کردن و دەرکردنی خوێندکاران لە زانستگا بە بیانووی جۆراوجۆر، پێشێلکردنی مافی ژنان و سەرجەم چین و توێژە جیاوازەکانی کۆمەڵگا و بە گشتی پەرەسەندنی گوشاری رژیم بۆ سەر خەڵکی کوردستان و میلیتاریزە کردنی شارەکانی کوردستانین، پەتی سێدارە بووەتە میوانی هەموو رۆژێی لاوانی کورد لە بەندیخانەکانی ئێران و شەپۆلێکی بەرفراوانتر لە دەستگیری رۆڵەکانمان لە لایەن رژیمەوە دەستی پێکردووە، هەموو ئەوانە نیشان لە ترس و دڵەراوکێی کۆماری ئیسلامییە لە جوڵانەوەیەکی جەماوەری خەڵکی ئێران و کۆماری ئیسلامی خۆی زۆر باش ئەوە دەزانێت کە ئەم دۆخە چیتر بۆ هیچ کەس تەحەمول ناکرێت و درەنگ یا زوو دەنگی ناڕەزایەتی کۆمەڵانی خەڵکی وەزاڵەهاتوو شەقامەکان دەگرێتەوە.

لە وەها هەلومەرجێکدا کە کۆماری ئیسلامی چ لە ناوخۆ و چ لە دەرەوە لە گەڵ کۆمەڵێك کێشەی جیددی بەرەوڕوویە بێ گومان ئێمەش وەک کورد دەبێ هەوڵ بدەین ئەم هەلە لە قازانجی خۆمان و بزووتنەوەکەمان بقۆزینەوە و یەکریزی و کاری جیددی هاوبەش لە نەورۆز یەکەم هەنگاوی کەڵک وەرگرتن لەم دەرفەتەیە.

خەڵکی تێکۆشەری کوردستان

وەرزی بەهار وەرزی هەڵپێچانی دیکتاتۆرەکانە لە رۆژهەڵاتی ناوەڕاست و بێ گومان ئەم شنەبای ئازادییە درەنگ یا زوو ئێمەش دەگرێتەوەو هەموو ئاڵوگۆڕەکانی ناوچەکە ئەوە نیشان دەدەن کە کۆماری ئیسلامی چیتر ناتوانێ بەم شێوەیە درێژە بە تەمەنی نگریسی خۆی بدات با نەورۆزی ئەمساڵ بکەین بە هێمای یەکڕیزی نەتەوەیی و لە وەرزی نوێبوونەوەی بەهار موژدەی یەکڕیزی و هاودەنگیمان بە خەڵکی کوردستان بگەیەنین، با جارێکیتر بە کۆماری ئیسلامی نیشان بدەین ئیرادەی خەباتکارانەی نەتەوەی کورد هەموو رۆژێكی ساڵ وەک ئاگری نەورۆز بڵێسەدارتر دەبێت.

با بە پۆشینی جلوبەرگی کوردی و جامانە و هەڵگرتنی ئاڵای کوردستان بەرەوپیری ئەم رۆژە نەتەوەییە بچین و بە کردنەوەی ئاگری نەورۆز لە شەقام، کۆڵانەکانی شار و گوندەکانی کوردستان پەیامی زیندووبونی هەستی نەتەوەییمان بە داگیرکەران بگەیەنین و بێ گومان شکستی دوژمن لە یەکڕیزی ئێمە دایە .

جارێکیتریش بە بۆنەی نەورۆز و ساڵی تازەوە گەرم و گەشترین پیرۆزبایی خۆمان ئاراستەی کۆمەڵانی خەڵکی کوردستان و لاوانی خوێنگەرم و خەباتکار دەکەین و دڵنیاتان دەکەینەوە رۆژی رزگاری ئێمەش نزیکە، ئاواتەخوازین ساڵی داهاتوو ئاگری سووری نەورۆز لە سەر بەرزایی لوتکەکانی کوردستان بکەینەوە و ئەم رۆژەلە گەڵ رۆژی رزگاری نەتەوەکەمان لە دەستی داگگیرکەرانی کوردستان جەژن بگرین.

بڕووخێ رژیمی کۆنەپەرەستی کۆماری ئیسلامی

سەرکەوێ بزوتنەوەی رزگاریخوازانەی گەلی کورد

٢٩ی رەشەممەی ٢٧١٧ی کوردی بەرابەر بە 19/3/2017ی زایینی

رێکخراوی کۆمەڵەی لاوانی رۆژهەڵات

یەکیەتیی لاوانی دێموکراتی کوردستانی ئێران

گروپی کاری لاوان و قوتابیانی پارتی ئازادی کوردستان

رێکخراوی  لاوانی خەباتی کوردستانی ئێران

رێکخراوی  لاوانی پێشڕەو