logoy lawan renwarپاراستن و پەرەپێدانی زمانی دایکیمان، پاراستن و گەشەپێدانی شوناسی مرۆیی  و  نەتەوەییمانە"

خه‌ڵکی تێکۆشه‌ری کوردستان

لاوانی ده‌روه‌ست و نیشتمانپه‌روه‌ری کورد

زمانی دایکی، کۆڵه‌که‌یه‌که‌ که‌ زۆربه‌ی مرۆڤه‌کان هه‌ر له ‌یه‌که‌مین هه‌ناسه‌کانی ژیانیاندا، که‌سایه‌تیی خۆیان له‌سه‌ر ئه‌و بنه‌مایه‌ دائه‌نێن.  زمانی دایکی، بنه‌مای شوناس و که‌سایه‌تیی فه‌رهه‌نگیی تاکه‌کانی کۆمه‌ڵگەیه‌.

بۆ هه‌ر نه‌ته‌وه‌یه‌کی خاوه‌ن مێژوو، هه‌ندێ پێناسه‌ی تایبه‌ت هه‌ن که وه‌ک باگراوند و به‌ستێنی فیکری، مه‌عریفی و کو‌لتووریی ئه‌و نه‌ته‌وه‌ ئه‌ناسرێنه‌وه‌ بۆ ناساندن و سه‌لماندنی بوون و مه‌وجودییه‌ت و شوناسی راستیه‌قینه‌ی ئه‌و نه‌ته‌وه‌، که گرنگترینیان زمان و کولتووره و  زمانی دایکیی  یه‌کێک له‌  پێناسه‌کانی‌ بوون و ناسنامه‌ی نه‌ته‌وه‌یی کورده‌.

له‌م نێوانه‌دا نه‌ته‌وه‌ی کورد وه‌کوو هه‌ر نه‌ته‌وه‌یه‌کی خاوه‌ن شوناس و مێژوو، به‌رده‌وام له خه‌بات و شۆڕشدا بووه بۆ به‌رگریکردن له مافه‌کانی و به‌رده‌وام له‌لایه‌ن هێزه‌ داگیرکاره‌کان و دوژمنانی کورده‌وه‌ هه‌وڵی سڕینه‌وه‌ی شوناسی راسته‌قینه‌یان دراوه.

 نه‌ته‌وه‌ی  کورد که یه‌کێک بووه‌ له پێشه‌نگانی خه‌بات بۆ مانه‌وه‌و به‌رده‌وامی شۆڕشی زمان، زمانه‌که‌ی که‌وتۆته ژێر هێڵی سووره‌وه‌ و قه‌ده‌غه‌کراوه‌، که ئه‌مه شێوەیەک لە ژینوسایدی کولتورییە، شێوازێکی سیاسی سڕینه‌وه‌و ده‌ستبه‌سه‌رداگرتنی فه‌رهه‌نگ و کولتووری نه‌ته‌وه‌یه‌ک که ئه‌و جۆره سیاسه‌ته‌ رادیکاڵانه له سیسته‌مه دیکتاتۆرو تۆتالیتێره‌کاندا په‌یڕه‌و ده‌کرێت. که هاوکات له گه‌ڵ دابه‌شکردن و پارچه‌ پارچه‌کردنی خاک و وڵاتی کورد، زمان و کولتووره‌که‌شی قه‌ده‌غه ‌ده‌که‌ن وهه‌وڵ ده‌ده‌ن ئاسه‌واری ئه‌و شوناسه‌ بسڕنه‌وه‌.

هه‌ر بۆیه  خه‌باتی نه‌ته‌وه‌ی کورد به‌رده‌وام بووه‌، هه‌رله خه‌باتی فه‌رهه‌نگی ومه‌ده‌نییه‌وه‌ بگره‌ هه‌تا خه‌باتی سیاسی و هه‌مه لایه‌نه‌.

 هه‌وڵدان و خه‌بات بۆ پاراستنی ئه‌و پیرۆزییانه‌ی که هه‌وڵی سڕینه‌وه‌یان ده‌درێت، بۆ هه‌موو نه‌ته‌وه‌کانی جیهان و له زۆربه‌ی هه‌ره‌ زۆری وڵاتاندا زمان ره‌مزی گه‌شه‌کردن و پێشکه‌وتنی شارستانییه‌ت و ته‌مه‌دونی ئه‌و کۆمه‌ڵگه‌ پێکده‌هێنێت. هه‌ر بۆیه توانیویانه ده‌سه‌ڵاتی سیاسی و مه‌شرووعییه‌تی خۆیان مسۆگه‌ر بکه‌ن و بناسرێن.

كۆماری ئیسلامی بە هەڵگرتنی دروشمی یەك نەتەوە و یەك زمان، نەتەوەی فارسی كردوەتە نەتەوەی باڵادەست و زمانی فارسی كردوەتە زمانی فەرمی و هیچ نەتەوەیه‌ك بۆی نیە بە زمانی دایکی خۆی بخوێنێ و بنووسێت.

یەكیەتیی لاوانی دێموكراتی كوردستانی ئێران بە بۆنەی رۆژی جیهانیی زمانی دایكی،  وێڕای مه‌حکووم کردنی کرده‌وه‌ دژه‌ مرۆڤانه‌ییه‌کانی کۆماری ئیسلامی و سیاسه‌ته‌ چه‌وته‌کانی دژ به‌ نه‌ته‌وه‌ بنده‌سته‌کان له‌ وڵاتی ئێراندا، هاوکات  خەبات و تێكۆشانی پر هەوراز و نشێوی هەموو چالاكانی ئەم بوارە لە رابردوو و ئێستا و داهاتووی نەتەوەكەماندا بەرز دەنرخێنێ و درێژەدانی ئەم رێگه‌یە تا گەیشتن بە ئامانجەكانی خۆی، بە ئەركێكی پیرۆز بۆ دەستەبەربوونی مافێكی رەوا دەزانێت.

بەرز و پیرۆز بێت ٢١ی فێڤرییە، رۆژی جیهانی زمانی دایكی

هه‌یئه‌تیی ئیجرایی

یه‌کیه‌تیی لاوانی دێموکراتی کوردستانی ئێران