yldki jnan xwendkaranکاتێک باس لەرۆژی شەهیدان و كۆماری كوردستان دەكرێ‌ گەورەیی پێشەوامان بۆ دەردەكەوێ‌ و كاتێكیش باس لەپێشەوای كوردان دەكرێ‌ خولقێنەری كۆمار و ئەو لوتكە بەرزەی نەخشەی ناسیۆنالیزمی كوردستانمان دێتەوە بیر.

پاش زیاتر لەنیو سەدە لەنەمانی ئەو ئەستێرە پڕشنگدارەی ئاسمانی كوردایەتی، دامەزراندنی دەسەڵاتی كوردی و دیاریكردنی مافی چارەنووس هەروا ئامانجی هەرە بەرزی بزووتنەوەی كوردایەتی هەر چوار بەشەكەی كوردستانە و ئێستاش لەو شەوەزەنگە تاریكەدا لە دەلاقەی میژوودا دەدرەوشێتەوە.

پێشەوا لەگەڵ ئەوەی كەسێكی ئاینی بووە، بەڵام زۆر بە کەمی بینراوە کە بیر و باوەڕەکەی لەکاری حیزبایەتی و دەوڵەتداریدا ڕەنگدانەوەی هەبێ و لە هەوڵە فەرهەنگی و كۆمەڵایەتییەكانیدا مەیدانی بۆ دوو توێژی ژنان و لاوان خۆش كرد و پێگەیاندن و پەروەردەكردنی ئەو توێژانەی بە ئەدیب و زاناكانی داهاتوو دەزانی و هەوڵی دەدا لە رێگەی ئەوانەوە پەرە بە زمان و ئەدەب و كولتوری نەتەوەكەی بدات. قازی محەممەد بە دامەزراندنی رێکخراوەکانی ژنان و لاوان لاپەڕەیەکی تازە و هزرێکی مۆدیڕنی لە مێژوودا تۆمار کرد و زۆر بە باشی لەوە تێگەیشتبوو کە لاو و شۆرش گرێ دراوی یەکترن و ئەو دوو چەمکەش پێکەوە داینامۆی گۆرانکارییەکانن.

هەر چەندە ئەگەر رۆژی 10‌ی خاكەلێوە بۆ ئێمە وەبیرهێنانەوەی ڕۆژی شەهیدانی كوردستان و گەڕانەوەیە بۆ شەهیدانی میللەتەكەمان و كۆتایی  چرای تەمەنی قیبلەی ئاواتی هەموو بەشەكانی كوردستانە، لەلایەكی دیكەشەوە سەرچاوەی ئیلهام و ورە بەرزیمانە و بەرزەداری روحیەی خەباتگێڕانەمان چرۆ دەردەکاتەوە و خەبات و قوربانیدان لە پێناوی ئامانجەكانی كۆمار رانەوەستاوە و ئاڵای تێكۆشان لەدەستی حیزبی دێمۆكراتدا بە شەكاوەیی ماوەتەوە.

لەساڵڕۆژی شەهید بوونی تۆدا ئەی گەورە رێبەری نەتەوەی كورد پێت دەڵێین كە ئەو نەسڵانەی هەوڵت بۆ پێگەیاندنیان دەدا نەیان هێشتووە رێگاكەت كوێر ببێتەوە و خەباتەكەی تۆمان بردۆتە پێش و گەورەترین شانازیشمان ئەوەیە كە خۆمان بە قوتابی قوتابخانەك دەزانین و لەسەرمانە وەكوو سەرباز و یارە وەفادارەکانت سەدری قازی، حەمە حوسێن خانی سەیفی قازی، عەلی بەگی شێرزاد و 11 ئەفسەر و پێشمەرگە ئیفتیخارییەكەی كۆمارپارێز، شۆڕەسواری بەئەمەگی رێگاكەت بین.

یەكیەتییەكانی ژنان، لاوان و خوێندكارانی دێمۆكراتی كوردستانی ئێران