logoy lawan renwarهاونیشتمانە بەرێزەكان

لاوانی خەباتکار و دەروەستی نەتەوەی كورد

لە لایەن كومیتەی بەرێوەبەری گشتی یەكیەتیی لاوانەوە بە بۆنەی 12ی ئاگۆست ، رۆژی جیهانی لاوان، گەرمترین و جوانترین پیرۆزباییەكانی خۆمان پێشكەش بە سەرجەم لاوانی ئازادیخوازی جیهان بەگشتی و لاوانی شۆرشگێر و ماندووی نەناسی ئێران و كوردستان بە تایبەتی دەكەین. 

لاوانی تێکۆشەری کوردستان, هەروەک  کە ئاگادارن 12ی ئاگوست رۆژی جیهانی لاوانە. رێکخراوی نەتەوە یەکگرتووەکان لە ساڵی 1999 ی زایینی بە فەرمی رۆژی 12ی ئاگۆستی وەکوو رۆژی جیهانی لاوان ناوزەد کردووە. ناوزەد کردنی رۆژی تایبەت بە لاوان لە جیهان دا یەکێک لە نیشانەکانی گرینگی لاوانە لەم سەردەمە.

ئەگەر سەیری وڵاتە گەشەسەندووەکانی دونیا و ئەو تازەگەرییانە بکەین کە لە رەوتی مێژووی  گەشەی وڵاتاندا هاتووەتە ئاراوە، بۆمان دەردەکەوێ کە لاوان دەوری کاریگەرییان هەبووە،  نەک وەکوو هێزێکی چاووگوێ بەستراو و بێ ئیرادە، بەڵکوو بە زۆری وەک رێبەرانی بزوتنەوە گەورەکان هاتونەتە مەیدان لەو گۆڕانکارییانەدا. کەواتە بۆمان روونە کە لاوان هێزی گۆڕان و پێكهاتەشكێنی هەر كۆمەڵگایەكن و لە كۆمەڵگای ئێران و كوردستان یشدا بە لەبەرچاوگرتنی ئەو توانا و پوتانسێڵەی كە توێژی لاو هەیەتی دەتوانن رۆڵێكی بەرچاو لە كۆمەڵگا دا بگێڕن.


ئێران کە زۆرینەی خەڵکەکەی پێکهاتووە لە لاوان، بە گشتی وڵاتێکی ئاڵۆزە بە هۆی گرفتەکانی بەردەم شوناسخوازیی نەتەوەیی و سەقامگیرنەبوونی دادپەروەری کۆمەڵایەتیی، تابە ئەمرۆش لە دەست داب و نەریتی کۆنەپەرستانە دەناڵێنێت.           
دیاردە كۆمەڵایەتییەكان لە ژێر سایەی كۆماری ئیسلامی ئێراندا، نەك ئەوەی هەنگاو بۆ چارەسەری هەڵناگیردرێت، بەڵكوو خودی سیستمی حاكم، یەكێكە لە هۆكارەكانی گەشەپێدانی دیاردە دزێوەكان بە تایبەت لە نێو لاوان و بە تایبەتی تر لە ناو لاوانی نەتەوە بندەستەكان لە قەوارەی سیاسی ئێراندایە.
هەر رۆژ دەیان لاو بە هۆی بەیانكردنی خواستەكانیان دەكەونە بەر ئەشكەنجە و ئیعدام و زیندانی كردن, هەڵاتنی مێشكەكان, دیاردەی بێکاری,  پەرەسەندنی خەسارگەلی کۆمەڵایەتی وەکوو ئیعتیاد و خۆکوژی و بی هیوایی بە داهاتوو کە بەرپرسی سەرەکی تەواوی ئەم دیاردانە کۆماری ئیسلامی و سیاسەتە هەڵەکانیەتی, لە ئێرانی ئەمڕۆ دا بۆتە یەكێك لەو دیاردانە كە رۆژ بە رۆژ روو لە پەرەسەندن دەكات.    
بە لە بەرچاوگرتنی ئەو  راستییە کە لاوان وەک فاکتەرێکی بە هێزی ئاڵ و گۆڕ و  سەرچاوەی وزە و دینامیزم و گرنگترین توێژی کۆمەڵگا، گەڵێک ئەرک و قۆرسایی دەکەوێتە سەر شانیان و بۆ بەر بەرەکانێی رەوشمەند لە گەڵ کاریگەری هێزە نیگەتیڤەکان و بۆ وەڵام دانەوە بە خواستەکانی رەوتی بەرەو پێشچوونی کۆمەڵگا و تا گەیشتن بە دۆخێکی دڵخوازی ئینسانی کە تێیدا ئاسەواری هەڵاواردنی نەتەوەیی و جنسی و زمانی و فەرهەنگی و سڕابێتەوە، بە پێی ستانداردە کۆمەڵایەتییەکانی سەردەم و بۆ گەیشتن بە ئاوا دۆخێک، ریگایەکی پڕ لە کۆسپ و تەگەرە و رۆژانێکی پڕ لە ماندوویی، چاوەڕێی لاوانی خەباتگێر دەکات و پێویستە لاوی كورد بە بەیان كردن و كاناڵیزە كردنی خواستەكانیان، هەنگاوی جیدی بۆ نەمانی ئەو سیستمە هەڵگرن.     

لە کۆتایی دا ئێمە وەكوو یەكیەتیی لاوانی دێموكراتی كوردستانی ئێران، پێرۆزبایی خۆمان بە بۆنەی 12 ئاگوست رۆژی جیهانی لاوان ئاراستەی سەرجەم لاوانی کوردستان دەکەین و هیوادارین لە رێگەی گەیشتن بە مافەڕەواکانیان هەنگاوی بەهێزیان شل نەبێت.

كومیتەی بەڕێوەبەری گشتی

یەكیەتیی لاوانی دێموكراتی كوردستانی ئێران

٢٠ی گەلاوێژی ٢٧١٥ی کوردی